سەرۆكی یەكەتیی تۆپی پێی نێودەوڵەتیی هەرێمەكان لە كۆنگرەیەكی ڕۆژنامەوانیدا ئاشكراى كرد پاڵپشتییەكی تەواو لە هەرێمی كوردستان دەكات بۆ میوانداریكردنی یارییەكانى تاسی ڤیڤاى 2012.
ئەمڕۆ یەكشەم لە كۆنگرەیەكی ڕۆژنامەوانیدا لە بارەگاى یەكەتیی تۆپی پێی هەرێمی كوردستان لە هەولێر میشێل كرێستنی سەرۆكی یەكەتیى تۆپی پێی نێودەوڵەتیی هەرێمەكان و سكرتێر و بەرپرسی پێوەندییەكانى یەكەتییەكە كۆمەڵێك بڕیارى نوێ ئاشكرا كرا.
سەرەتا سەلام حوسێن سكرتێری یەكەتیی ناوەندیی تۆپی پێی كوردستان ئەوەى ڕوون كردەوە كە شاندی میوان لە ماوەى 5 ڕۆژی ڕابردوودا تەواوى یاریگە، هۆتێل، باڵەفڕگە و شوێنە گشتییەكانیان بینیوە، هەروەها لەگەڵ بەرپرسانی حكوومەتی هەرێمی كوردستانیش كۆ بوونەتەوە و ئەمڕۆ لە ڕێگەى باڵەفڕگەى هەولێرەوە دەگەڕێنەوە.
دواتر میشێل كرێستن سەرۆكی یەكەتیی تۆپی پێی نێودەوڵەتیی هەرێمەكانى دنیا ڕای گەیاند هەرێمی كوردستان چانسێكی بەهێزی هەیە بۆ میوانداریكردنی یارییەكانى ڤیڤاى 2012، چونكە لە ڕووی هۆتێل، یاریگە، باڵەفڕگە و بارى ئاسایشەوە زۆر ئامادەیە بۆ ئەو پاڵەوانیەتییە.
ئەوەشی گوت "ڕاپۆرتێكی زۆر باش ئامادە دەكەین لەبارەی هەرێمی كوردستان لە هەموو ڕوویەكەوە كە لە 5 تشرینی دووەم/نۆڤێمبەردا لە كۆبوونەوەى وڵاتانى ئەندامى یەكەتیی تۆپی پێی نێودەوڵەتیی هەرێمەكانى دنیادا لە فرەنسا دەخوێنرێتەوە، لەگەڵ هەریەك لەو وڵاتانەى داواكاریى پێشكێش دەكەن، بەڵام دەستنیشانكردنی ئەو وڵاتەى شەرەفی میوانداریەتییەكە دەباتەوە لە مانگی نیسان/ئەپریلی داهاتوودا دەبێ".
هەروەها گوتی "لێرە تەنیا تۆپی پێ لە یاریگە گەورەكان ناكرێ، بگرە لە شەقام و گەڕەكەكانیش یاریگە هەیە، خەڵكی ناوچەكە هەموو حەز بەتۆپی پێ دەكەن، تا ئەوەشمان دیت كە بەرپرسانی حكوومەتیش تەواو حەزیان لە تۆپی پێیە، بۆیە ئەگەر پاڵەوانیەتییەكە لە هەرێمی كوردستان بێت زۆر سەركەوتوو دەبێ، بۆیە ئێمە دەبینە 3 باڵیۆزی هەرێمی كوردستان لە ئەوروپا".
میشێل كریستین لەبارەی كارەكانى داهاتوو و فرەوانكردنی كارەكانیان لە ئاستی نێودەوڵەتیدا گوتی "لە بەرنامەدایە خولی ناوبژیوانان و ڕاهێنەرایەتیی نێودەوڵەتی بۆ هەرێمەكانى ئەندامی یەكەتییەكەمان بكەینەوە، بەڵام جارىَ دۆخی داراییمان وەك پێویست نییە و كار لەسەر ئەوە دەكەین سپۆنسەر بۆ خۆمان پەیدا بكەین، ئەوكات كارەكانمان زۆر فرەوان دەكەین".
هەروەها خوێندنەوەى لەسەر یانەكان و هەڵبژاردەى كوردستان ئاشكرا كرد بەوەی پێویستە ڕاهێنەرانی هەرێمی كوردستان بایەخ بەلایەنی تەكتیكیی یاریزانانیان زیاد بكەن، بەڕاستی هەڵبژاردەى كوردستان باشترین هەڵبژاردەیە بەشێوەیەك لە پاڵەوانیەتیی ڤیڤاى ڕابردوو لە میلانۆ پاڵێوراوى یەكەم بوو بۆ بەدەستهێنانى نازناوەكە، بەڵام تۆپی پێ بردنەوە و دۆڕانی تێدایە.
سەفین كانەبی سەرۆكی یەكەتیی تۆپی پێی كوردستانیش گوتی "ئومێدەوارین كەتواری پێشكەوتنى وەرزشی ناوچەكەمان بگەیەننە وڵاتانى ئەوروپا، بەڵێنی ئەوەش دەدەین هەموو ئاسانكارییەك دەكەین ئەگەر گرەوى پاڵەوانیەتیی ڤیڤامان بردەوە".
كانەبی بوونی ئەو 3 كەسایەتییەی وەك باڵیۆزی هەرێمی كوردستان لە ئەوروپا بە"شەرەفێكی گەورە" زانى.