PNA – ئه‌مرِۆ دوایین چوار یاری له‌ پاشكۆی پاڵاوتنه‌كانی ئه‌وروپا بۆ كۆتاییه‌كانی جامی جیهانی 2010 كه‌ باشووری ئه‌فریقیا میوانداری ده‌كات به‌رِێوه‌ده‌چێ و هه‌موو هه‌ڵبژارده‌كان هیوایان ماوه‌ بۆ سه‌ركه‌وتن بۆ كۆتاییه‌كان.
له‌ یاری یه‌كه‌م كه‌ كاتژمێر 9ی شه‌و به‌ كاتی هه‌ولێر له‌ یاریگه‌ی دۆنباس ئه‌رینا له‌ شاری كیێڤی ئۆكرانی به‌رِێوه‌ده‌چێ، هه‌ڵبژارده‌ی ئۆكرانیا میوانداری هه‌ڵبژارده‌ی یۆنان ده‌كات.
له‌ یاری چوون، هه‌ردوو هه‌ڵبژارده‌ به‌بێ گۆڵ به‌رانبه‌ر بوون، بۆیه‌ پێشبینییه‌كان وای بۆ ده‌چن له‌ یاری هاتن هه‌ردوولا به‌ هه‌موو هێزێكیان بێنه‌ نێو یاریگه‌ بۆ برِینی پلیتی سه‌ركه‌وتن، چونكه‌ ئه‌مه‌ دوایین چانسه‌ تا چوارساڵی تر.
له‌ یاری دووه‌م كه‌ كاتژمێر 45ر10ی شه‌و له‌ یاریگه‌ی بیلینۆ بۆلی به‌رِێوه‌ده‌چێ، بۆسنه‌ و هیرسك میوانداری پورتوگال ده‌كات، له‌م یارییه‌ تا راده‌یه‌ك ئه‌ركی پورتوگال گرانه‌، به‌تایبه‌ت به‌بێ یاریزان كریستیانۆ رۆناڵدۆ یاری ده‌كات و له‌ یاری چوون پورتوگال به‌ گۆڵێكی بێ به‌رانبه‌ر بردیه‌وه‌، بۆیه‌ پێشبینی ده‌كرێت كه‌ یارییه‌كی زۆر به‌هێز بێت چونكه‌ بۆسنه‌ییه‌كان هه‌رِشه‌ی ئه‌وه‌یان كردووه‌ كه‌ یاریگه‌ ده‌بێته‌ دۆزه‌خ بۆ پورتوگالییه‌كان.
له‌ سێیه‌م یاری كه‌ له‌ هه‌مان كاتی یاری دووه‌م له‌ یاریگه‌ی لۆدسكی ڤێرت به‌رِێوه‌ده‌چێ، سلۆڤینیا میوانداری رووسیا ده‌كات، له‌ یاری چوون رووسیا به‌ دوو گۆڵ به‌رانبه‌ر به‌ یه‌ك گۆڵ بردیه‌وه‌، بۆیه‌ یاری هاتن زۆر به‌هێز ده‌بێ و هه‌ردوو هه‌ڵبژارده‌ هه‌وڵ ده‌ده‌ن پلیتی سه‌ركه‌وتن به‌ده‌ست بهێنن.
دوایین یاری پاشكۆ له‌ یاریگه‌ی سان دۆنێ له‌ پاریس به‌رِێوه‌ده‌چێ و فه‌ره‌نسا میوانداری ئێرله‌ندا ده‌كات، له‌ یاری چوون كه‌ له‌ ئێرله‌ندا به‌رِێوه‌چوو، فه‌ره‌نسا به‌ گۆڵێكی بێ به‌رانبه‌ر یارییه‌كه‌ی برده‌وه‌، بۆیه‌ تارِاده‌یه‌ك ئه‌ركی ئاسانه‌ له‌ یارییه‌كه‌ی سبه‌ی، به‌ڵام ئێرله‌نداش به‌ ئومێدی ئه‌وه‌ یاری ده‌كات كه‌ پلیته‌كه‌ له‌ نێو قورِگی شێر ببات.