یه‌كێتی ناوه‌ندی تۆپی پێی كوردستان كۆبوونه‌وه‌ی ئاسایی خۆی به‌ئاماده‌بوونی سه‌رۆك و جێگرو سه‌رجه‌م ئه‌ندامانی رۆژی شه‌ممه‌ رێكه‌وتی 30/1/2010 گرێدا و ئه‌م بڕیارانه‌ی خواره‌وه‌ی ده‌ركرد :
یه‌كه‌م:ئاماده‌بوونی ڕاهێنه‌رانی ده‌ستنیشانكراوبۆ هه‌ڵبژارده‌ی كوردستان له‌ كۆبوونه‌وه‌ی یه‌كێتی ناوه‌ندی تۆپی پێی كوردستان كه‌ له‌م به‌رێزانه‌ی خواره‌وه‌پێكهاتووه‌:
1. عه‌بدوڵڵا مه‌حمود ڕاهێنه‌ر
2. خسرۆ گورون  یاریده‌ده‌ری ڕاهێنه‌ر
3. زێره‌ڤان سه‌عدوڵڵا یاریده‌ده‌ری ڕاهێنه‌ر
سه‌رپشككردنی ده‌سته‌ی ڕاهێنه‌ران له‌ ده‌ستنیشانكردنی یاریزان و پێویسته‌ ناوی یاریزانن ئاشكرا نه‌كرێت تا له‌ یه‌كێتی تۆپی پێ‌ ڕاده‌گه‌یه‌ندرێت.
دووه‌م:كۆبوونه‌وه‌ی تایبه‌ت له‌گه‌ڵ لیژنه‌ی ناوبژیوانانی كوردستان كه‌ تازه‌ ده‌ستنیشانكراوه‌ بۆ گفتوگۆ و به‌ره‌وپێش بردنی ره‌وشی ناوبژیوانان و گرنگیدان و پێشكه‌وتنیان.ده‌سه‌ڵاتی ته‌واو بۆ ئه‌م لیژنه‌یه‌ هه‌یه‌ بۆ بڕیاردان و له‌ خه‌ڵات و سزادان و ده‌ستنیشانكردنی ستافی ناوبژیوانی یارییه‌كان.
سێ‌ یه‌م:له‌ یاری نێوان هه‌ولێرو یانه‌ی سیروانی نوێ‌ له‌ خولی نایاب به‌هۆی ره‌فتاری ناشیرینی ڕاهێنه‌ری گۆڵچیه‌كانی هه‌ولێر (عه‌بدولخالیق مه‌حمود)بڕیاردرا:
أ‌.یاوه‌ری نه‌كردنی تیپه‌كه‌ی له‌ سێ‌ یاری داهاتوو.
ب‌.غه‌رامه‌كردنی ناوبراو به‌ بڕی(250000)دوو سه‌دوپه‌نجا هه‌زار دینار.
ج.ئاگاداری كۆتایی ناوبراو له‌دووباره‌ نه‌بوونه‌وه‌ی ئه‌م ره‌فتاره‌ گه‌رنا رووبه‌ڕووی سزای توند تر ده‌بێت.
چواره‌م:له‌ یاری نێوان یانه‌ی كه‌ركوك و یانه‌ی پێرس له‌ خولی نایاب بڕیاردرا:
أ‌.ئاگاداری كۆتایی بۆ یانه‌ی كه‌ركوك به‌ كۆنتڕۆڵ كردنی جه‌ماوه‌ركه‌یان گه‌رنا یارییه‌كانی داهاتوویان ده‌گوازرێته‌وه‌ بۆ یاریگایه‌كی تر.
ب‌.ئاگاداری كۆتایی بۆ یاریزانی یانه‌ی پێرس(محه‌مه‌د یوسف)به‌ دووباره‌ نه‌بوونه‌وه‌ی ڕه‌فتاری ناوه‌رزشی گه‌رنا سزاكان قورستر ده‌بێت.
پێنجه‌م:راگرتنی سه‌رپه‌رشتیاری یاری(سلێمان ئیسماعیل)له‌ یاری نێوان یانه‌ی كه‌ركوك و یانه‌ی هه‌ندرێن له‌ خولی نۆیه‌می لاوان بۆماوه‌ی(1) یه‌ك مانگ به‌هۆی ئاماده‌نه‌بوونی وه‌ك سه‌رپه‌رشتیار له‌م یارییه‌.
شه‌شه‌م:له‌یاری نێوان یانه‌ی كه‌ركوك و یانه‌ی هه‌ندرێن له‌ خولی نۆیه‌می لاوان به‌هۆی كه‌مته‌رخه‌می و ئاژاوه‌ بڕیاردرا:
أ‌.راگرتنی ناوبژیوان(ئیبراهیم سه‌عید)بۆ ماوه‌ی دوو هه‌فته‌.
ب‌.غه‌رامه‌كردنی ناوبراو به‌ بڕی(100000)سه‌د هه‌زار دینار.
ج.راگرتنی یاریده‌ده‌ری ڕاهێنه‌ری لاوانی یانه‌ی هه‌ندرێن (شكور برهان) تا كۆتایی خول.
د. بانگهێشتكردنی ڕاهێنه‌ری لاوانی یانه‌ی هه‌ندرێن(فه‌تحی قه‌ره‌نی) بۆ باره‌گای یه‌كێتی تۆپی پێی كوردستان رۆژی دووشه‌ممه‌ی داهاتوو رێكه‌وتی 1/2/2010.
و. سوپاس و پێزانین بۆ سه‌رپه‌رشتیاری تیپی لاوانی هه‌ندرێن(سرود محه‌مه‌د)به‌ هه‌ڵوێستی وه‌رزشییانه‌ی له‌ هێوركردنه‌وه‌ی یارییه‌كه‌یان به‌رامبه‌ر یانه‌ی لاوانی كه‌ركوك.
حه‌وته‌م: هه‌ر یاریزانێك كه‌ یاری له‌ خولی لاوان نه‌كردبێت و له‌ دایكبووی گونجاوبێت ده‌توانێت به‌شداری له‌ خولی تازه‌پێگه‌یشتووان بكات.
هه‌شته‌م: ده‌ستنیشان كردنی ده‌سته‌ی ناوبژیوانان و سه‌رپه‌رشتیارانی خولی چواره‌می قۆناغی دووه‌می نایاب و خولی ده‌یه‌می لاوان و خولی یه‌كه‌می تازه‌پێگه‌یشتووان.