سلێمانی _ سدیق عه‌واڵی .....ئه‌مرۆ 4/ 2 له‌ یاریگاكانی كوردستان كاروانێكی دیكه‌ی یارییه‌كانی خولی نایابی یانه‌كانی كوردستان به‌رێوه‌چوو ، له‌ یاریگای سلێمانی و له‌ میانه‌ی یارییه‌كانی هه‌فته‌ی چواره‌می قۆناغی دووه‌می خولی پله‌ نایابی تیپی یانه‌كانی كوردستاندا ، تیپی تۆپی پێی یانه‌ی سیروانی نوێ له‌ دووه‌م یاری ملعه‌به‌كه‌ی سلێمانیدا و له‌ژێر لێزمه‌ی باران و سه‌رماو سۆڵه‌ی شاره‌كه‌دا میوانداری تیپی پێشكه‌وتوانی یانه‌ی كه‌ركوكی گڕو كڵپه‌ی لوتكه‌ی خوله‌كه‌ كرد ، له‌هه‌مانكاتدا و له‌ یاریگای كه‌مال سه‌لیم تایبه‌ت به‌ زانكۆی سلێمانی تیپی یانه‌ی نه‌ورۆزیش به‌ یانه‌ی بروسكی هه‌ڵگری نازناوی خولی وه‌رزی رابردوو نایابی كوردستان گه‌یشت ، یارییه‌كه‌ی سیروانی نوێ و كه‌ركوك تاراده‌یه‌كی ئاست ناوه‌ند و پڕ له‌ زه‌حمه‌ت تایمی یه‌كه‌می تێپه‌ڕاند ئه‌ویش به‌هۆی پاشماوه‌ی ئاوی باراناوه‌وه‌ كه‌ له‌ یاریگاكادا مابوه‌وه‌ ، هه‌روه‌ها تا دواساته‌كانی یارییه‌كه‌ هیلاكی و ماندوبونی زۆری بۆ یاریزانانی دوو پێكهاته‌كه‌ پێوه‌دیاربوو.
له‌ ئه‌نجامدا سیروانی نوێ له‌سه‌ر هێرشه‌كانی بۆسه‌ر تۆری یانه‌ی كه‌ركوك به‌رده‌وامی پێدا و تا یاریزان كارساز مه‌حمه‌د توانی له‌ دقیقه‌ی 64دا تاكه‌ گۆڵی بردنه‌وه‌ی یانه‌كه‌ی تۆمار بكات ، له‌به‌رامبه‌ردا یانه‌ی گڕو كڵپه‌ هێرشه‌كانی بێ ئاكام مانه‌وه‌ و یارییه‌كه‌ 1 _ سفر له‌ به‌رژه‌وه‌ندی سیروانی نوێ كۆتایی هات ، هه‌روه‌ها یارییه‌كه‌ی نه‌ورۆز بروسكیش به‌بێ گۆڵ كۆتایی هات.