هه‌رژین عوسمان – سلێمانی : له‌كه‌شێكی باراناویدا و له‌میانه‌ی هه‌فته‌ی نۆیه‌می خولی تازه‌پێگه‌یشتووانی كوردستان نیوه‌ڕۆی ڕۆژی پێنجشه‌ممه‌ 18/3 تیپی تازه‌پێگه‌یشتووانی یانه‌ی پێشمه‌رگه‌ی سلێمانی میوانداری یانه‌ی خاكی كرد ، ئه‌م یارییه‌ به‌داوه‌ری (هێرش عوسمان) ناوبژیوانی ناوه‌ڕاست و (سه‌ردار عه‌لی ، حوسێن محه‌مه‌د) یاریده‌ده‌ری ناوبژیوان و (كارساز محه‌مه‌د) ناوبژیوانی چواره‌م له‌ یاریگای كه‌مال سه‌لیم به‌ڕێوه‌چوو .
له‌سه‌ره‌تای یارییه‌كه‌وه‌ یاریزانانی خاك باشتر یارییانده‌كرد و زۆرتر هه‌وڵی تۆماركردنی گۆڵیان ده‌دا ، له‌ئه‌نجامی ئه‌م هه‌وڵانه‌دا و له‌ خوله‌كی 24 دا (ئاكۆ عوسمان) یانه‌ی خاكی كرده‌ خاوه‌نی گۆڵی یه‌كه‌م ، به‌هۆی توند و تیژییه‌وه‌ داوه‌ر له‌م گێمه‌دا چوار كارتی زه‌ردی به‌ڕووی یاریزانانی هه‌ردوو تیپدا به‌رزكرده‌وه‌ و گێمی یه‌كه‌م به‌ گۆڵێكی بێه‌رامبه‌ر له‌به‌رژه‌وه‌ندی یانه‌ی خاك كۆتاییهات .
له‌گێمی دووه‌مدا یاریزانانی پێشمه‌رگه‌ ڕیزه‌كانی خۆی ڕێكخسته‌وه‌ و دوای تێپه‌ڕبوونی 5 خوله‌ك له‌ ده‌ستپێكردنی گێمی دووه‌م (هه‌ڵكه‌وت عه‌بدول) گۆڵی به‌رامبه‌ری بۆ یانه‌ی پێشمه‌رگه‌ تۆماركرد ، دوای یه‌ك خوله‌ك له‌و گۆڵه‌ داوه‌ری یارییه‌كه‌ (بیلال ئیبراهیم)ی له‌ یانه‌ی پێشمه‌رگه‌ كرده‌ ده‌ره‌وه‌ ئه‌ویش دوای وه‌رگرتنی دووه‌م كارتی زه‌رد ، سه‌ره‌ڕای هه‌وڵه‌كانی هه‌ردوو تیپ بۆ تۆماركردنی گۆڵی پێشكه‌وتن به‌ڵام ئه‌نجامی یارییه‌كه‌ گۆڕان كاری به‌سه‌ردانه‌هاتوو یارییه‌كه‌ به‌گۆڵێًك بۆ هه‌ردوولا كۆتایی هات و یانه‌ی پێشمه‌رگه‌ی سلێمانی له‌ یاریگای خۆیدا دوو خاڵی گرنگی له‌ده‌ستدا .