سلێمانی / سدیق عه‌واڵی...ئه‌مرۆ دووشه‌ممه‌ جه‌وله‌یه‌كی دیكه‌ی خولی پله‌یه‌كی یانه‌كانی كوردستان له‌یاری تۆپی پێیدا به‌رێوه‌چوو ، له‌یاریگای كه‌مال سه‌لیم هه‌ردوو تیپی یانه‌كانی خانه‌قین و چه‌مچه‌ماڵ دوور له‌یاریگاكانی خۆیان له‌یارییه‌كی چاره‌نوسی هه‌فته‌ی هه‌شته‌مدا به‌یه‌كگه‌یشتن ، هه‌ردوو پێكهاته‌ی رووبه‌روو یارییه‌كی به‌هێز وماراسۆنییان ئه‌نجامدا تاراده‌یه‌ك كه‌هه‌ریه‌ك وه‌ڵامی هێرشه‌كانی یه‌كترییان ده‌دایه‌وه‌ ، پێكهاته‌ی یانه‌ی چه‌مچه‌ماڵ له‌دقیقه‌ی 6دا و به‌پێی یاریزان هه‌ردی فاتیح ده‌رگای گۆڵكردنی كرده‌وه‌ ، دواتر له‌دقیقه‌ی 21دا خانه‌قین وه‌ڵامی خۆی دایه‌وه‌ و یاریزان عه‌لی فه‌ره‌ج گۆڵی یه‌كسانبونی تۆماركرد ، له‌دقیقه‌ی 44دا هێرشه‌كانی چه‌مچه‌ماڵ وایكرد یاریزان هاوكار سدیق گۆڵی دووه‌می یانه‌كه‌ی و تایمی یه‌كه‌م تۆمار بكات.
تایمی دووه‌م یارییه‌كه‌ گه‌رموگوری زیاتری وه‌رگرت تا یاریزانی خانه‌قین عه‌قیل فه‌خری له‌دقیقه‌ی 67دا گۆڵی دووه‌م و یه‌كسانبونی جارێكی دیكه‌ خانه‌قینی خسته‌وه‌ سه‌ر هێڵی خۆی ، ئاستی یارییه‌كه‌ زیاتر فشاری هێرشی بۆ هه‌ردوو پێكهاته‌ وه‌رگرت ، یاریزانی چه‌مچه‌ماڵ هاوكار سدیق له‌دقیقه‌ی 81دا جارێكی دیكه‌ ئه‌گه‌ری بردنه‌وه‌ی دایه‌ یانه‌ی چه‌مچه‌ماڵ ، به‌ڵام وه‌ڵامی خانه‌قین له‌رێگه‌ی یاریزان حه‌یده‌ر فه‌ره‌ج له‌دقیقه‌ی 85دا به‌تۆماركردنی گۆڵی یه‌كسانبون ئه‌نجامه‌كه‌ی هاوسه‌نگ كرده‌وه‌ و له‌ئه‌نجامی كۆتایی هه‌ردوولا 3_ 3 یه‌كسانبون.