راپۆرت - رێبین ره‌مزی/ هه‌ولێر – له‌ نێو ده‌سته‌ی گشتی یه‌كێتی تۆپی پێ عێراق 12 ئه‌ندامی یانه‌كانی كوردستان هه‌یه‌، ئه‌م 12 ئه‌ندامه‌ هه‌موو یه‌ك هه‌ڵوێستیان هه‌یه‌ و هه‌وڵ ده‌ده‌ن له‌م هه‌ڵبژاردنه‌ ده‌نگ بده‌نه‌ ئه‌ندامه‌ كورده‌كان.
رۆژی دووشه‌ممه‌ له‌ باره‌گای یه‌كێتی تۆپی پێ كوردستان سه‌فین كانه‌بی سه‌رۆكی یه‌كێتی تۆپی پێ كوردستان و ئه‌ندامی مه‌كته‌بی ته‌نفیزی لێژنه‌ی ئۆڵۆمپی كوردستان له‌ كۆنگره‌یه‌كی رۆژنامه‌نووسیدا ده‌رباره‌ی چاره‌سه‌ركردنی كێشه‌ی یه‌كێتی تۆپی پێ عێراق بۆ رۆژنامه‌نووسان گوتی: دوای چه‌ندین كۆبوونه‌وه‌ی یه‌ك له‌ دوای یه‌كی لێژنه‌ی ئۆڵۆمپی عێراق و لێژنه‌ی ئۆڵۆمپی كوردستان و یه‌كێتی تۆپی پێ عێراق و ماندووبونێكی زۆر توانیمان چاره‌سه‌رێك بۆ ئه‌م كێشه‌یه‌ بدۆزینه‌وه‌ توانیمان رێگه‌ چارێك بۆ ئه‌م كێشه‌ بدۆزینه‌وه‌.
له‌ وڵامی پرسیارێكی ئاژانسی هه‌واڵی په‌یامنێر دا ده‌رباره‌ی یه‌ك ریزی یانه‌كانی كوردستان له‌م هه‌ڵبژارده‌نه‌ سه‌فین كانه‌بی گوتی: ئێمه‌ له‌ نێو ده‌سته‌ی گشتی یه‌كێتی تۆپی پێ عێراق 12 ئه‌ندامان هه‌یه‌، ئه‌م 12 ئه‌ندامه‌ هه‌موو یه‌ك هه‌ڵوێستیان هه‌یه‌ و هه‌وڵ ده‌ده‌ن له‌م هه‌ڵبژاردنه‌ ده‌نگ بده‌نه‌ ئه‌ندامه‌ كورده‌كان بۆ ئه‌وه‌ی رێژه‌ی كورد له‌ نێو یه‌كێتی تۆپی پێ عێراق له‌ 2 تا 3 ئه‌ندام بێت بۆ ئه‌وه‌ی بتوانین به‌رگری له‌ مافه‌كانی یانه‌ كوردستانیه‌كان بكه‌ین ئه‌مه‌ش مافێكی ره‌وای خۆمانه‌، چونكه‌ به‌رژوه‌ندی كوردستان به‌هیچ شتێكی تر ناگۆرینه‌وه‌ و ئه‌م یانانه‌ هیچیان له‌سه‌ر رێنماییه‌كانی لێژنه‌ی ئۆڵۆمپی كوردستان نه‌چووینه‌ ده‌ره‌وه‌ و هه‌رده‌م به‌رژوه‌ندی كوردستان له‌ پێش هه‌موو شتێك داده‌نێن.
 هه‌ر له‌ هه‌مان كۆنگره‌، د.ئالان قادر ئه‌مینداری گشتی لێژنه‌ی ئۆڵۆمپی كوردستان باسی له‌ رۆڵی لێژنه‌ی ئۆڵۆمپی كوردستان كرد له‌ چاره‌سه‌ركردنی كێشه‌ی یه‌كێتی تۆپی پێ عێراق و گوتی: دووباره‌ لێژنه‌ی ئۆڵۆمپی كوردستان ئه‌وه‌ی سه‌لماند، كه‌ كوردستان كلیلی چاره‌سه‌ركردنی هه‌موو كێشه‌ ئاڵۆزه‌كانه‌ جا چ وه‌رزشی بێت یاخود سیاسی بێت، چونكه‌ توانیمان له‌ ماوه‌یه‌كی كورتدا كێشه‌ی یه‌كێتی تۆپی پێ عێراق چارسه‌ر بكه‌ین.
له‌ ته‌وه‌رێكی تری كۆنگره‌كه‌دا د.ئاڵان قادر گوتی: پێش گه‌رانه‌وه‌ی هه‌ردوو نوێنه‌ری فیفا و یه‌كێتی تۆپی پێ ئاسیا له‌ 90% ئه‌وه‌مان ته‌ئكید كرده‌وه‌، كه‌ تۆپی پێ عێراق تووشی سزای نێوده‌وڵه‌تی نه‌بێت و هه‌ردوو نوێنه‌ری ئه‌وه‌یان ته‌ئكید كرده‌وه‌، كه‌ به‌ هه‌موو شێوه‌یه‌ك هه‌وڵ ده‌ده‌ن تۆپی پێ عێراق رانه‌گیرێت.
خاڵی دووه‌م به‌ پێی یاسایی نێوده‌وڵه‌تی هه‌ر یه‌كێتیك ته‌نیا 3 جار مافی هه‌یه‌ بۆ ئه‌وه‌ی كاره‌كانی درێژ خایه‌ن بكاته‌وه‌، به‌ڵام به‌هۆی ئه‌وه‌ی عێراق وه‌زعی تایبه‌تی خۆی هه‌یه‌ بۆیه‌ ره‌نگه‌ بریارێكی تایبه‌ت به‌ یه‌كێتی تۆپی پێ عێراق بدرێت، كه‌ ماوه‌ی كاره‌كانی یه‌كێتی تۆپی پێ نێوده‌ڵه‌تی نوێبكرێته‌وه‌.
 خاڵی سێیه‌م ره‌نگه‌ فیفا یه‌كێتی تۆپی پێ عێراق هه‌ڵبوشێنته‌وه‌ و ده‌سته‌یه‌كی كاتی بۆ به‌رێوه‌به‌ردنی كاره‌كانی تۆپی پێ عێراق پێكبهێنێت بۆ ئه‌وه‌ی كار له‌سه‌ر به‌رێوه‌بردنی خولی عێراق و ئاماده‌كاری بۆ ئه‌نجامدانی هه‌ڵبژارده‌كانی ئه‌م یه‌كێتیه‌ بكات.