له یارییه‌كانی هه‌فته‌ی شازده‌ی خولی پله‌ نایابی كوردستان له‌ تۆپی پێ تێیدا یانه‌كانی كه‌ركوك و بروسك و سیروانی نوێ و دهۆك و خاك و شێروانه‌ سه‌ركه‌وتنیان به‌ده‌ست هێنا.
له‌ یاریگه‌ی كه‌ركوك، كه‌ركوك هه‌ر له‌ پێشه‌نگه‌ به‌ (33) خاڵ دوای ئه‌وه‌ی ئه‌مرِۆ به‌ ئه‌نجامی (1-0) له‌ پێرسی برده‌وه‌، پێرس گه‌رِایه‌وه‌ پله‌ی پێنجه‌م به‌ (25) خاڵ، بروسك هاته‌ پله‌ی دووه‌م دوای ئه‌وه‌ی به‌ ئه‌نجامی (3-0) له‌ سه‌وره‌ی برده‌وه‌ و كۆی خاڵه‌كانی گه‌یانده‌ (28) خاڵ، سه‌وره‌ش گه‌رِایه‌وه‌ بۆ پله‌ی 13 به‌ 12 خاڵ.
سیروانی نوێ به‌ ئه‌نجامێكی باش گه‌رِایه‌وه‌ سلێمانی دوای بردنه‌وه‌ی له‌ هه‌ولێر به‌ ئه‌نجامی (2-1)، سیروانی نوێ چووه‌ پله‌ی سێیه‌م به‌ 26 خاڵ و هه‌ولێر گه‌رِایه‌وه‌ پله‌ی چواره‌م به‌ 25 خاڵ.
له‌ یاریگه‌ی دهۆك، دهۆك له‌ پێشمه‌رگه‌ی هه‌ولێری برده‌وه‌ و كۆی خاڵه‌كانی گه‌یانده‌ 24 خاڵ چووه‌ پله‌ی حه‌وته‌م، پێشمه‌رگه‌ی هه‌ولێر هه‌ر له‌ پله‌ی ده‌یه‌م مایه‌وه‌.
هه‌ردوو یانه‌ی دوایینی ریزبه‌ند له‌م هه‌فته‌یه‌ سه‌ركه‌وتنیان به‌ده‌ست هێنا، له‌ یاریگه‌ی كه‌لار، شێروانه‌ به‌ ئه‌نجامی گۆڵێكی بێ به‌رانبه‌ر له‌ هندرێنی برده‌وه‌ و هندرێن گه‌رِایه‌وه‌ پله‌ی نۆیه‌م به‌ 23 خاڵ، به‌ڵام ئه‌م بردنه‌وه‌ به‌س نه‌بوو بۆ ئه‌وه‌ی شێروانه‌ پله‌ی دوایینی ریزبه‌نده‌كه‌ جێبهێڵێ هه‌رچه‌نده‌ كۆی خاڵه‌كانی گه‌یانده‌ 11 خاڵ، چونكه‌ خاك كه‌ له‌ پله‌ی شیازده‌بوو له‌ یاریگه‌ی خۆی به‌ ئه‌نجامی (2-1) له‌ نه‌ورۆزی برده‌وه‌ و چووه‌ پله‌ی دوازده‌ به‌ 12 خاڵ.
له‌ دوایین یاری ئه‌م هه‌فته‌یه‌، هه‌ردوو یانه‌ی پێشمه‌رگه‌ی سلێمانی و ئارارات به‌ ئه‌نجامی گۆڵێك بۆ هه‌ر لایه‌ك به‌رانبه‌ربوون و هه‌ردووكیان له‌ هه‌مان پله‌ی پێشوو مانه‌وه‌، پێشمه‌رگه‌ له‌ پله‌ی شه‌شه‌مه‌ به‌ (24) خاڵ و ئارارات له‌ پله‌ی هه‌شته‌مه‌ به‌ (24) خاڵ و ته‌نها جیاوازی گۆڵ له‌ نێوانیاندایه‌.