یه‌كیَتى ناوه‌ندى تۆپى پیَى كوردستان رۆژى دوو شه‌ممه‌ى  كۆبوونه‌وه‌ى ئاسایى خۆى به‌ئاماده‌بوونى سه‌رۆك و سه‌رجه‌م ئه‌ندامانى گریَدا و تیایدا ئه‌م بریارانه‌ى خواره‌وه‌ى ده‌ركرد:1. به‌ئاماده‌بوونى هه‌ریه‌كه‌ نویَنه‌رى یانه‌ى سلیَمانى و سه‌رپه‌رشتیارو ناوبژیوانانى یارى نیَوان یانه‌ى زاخۆ و یانه‌ى سلیَمانى, لیَكۆلینه‌وه‌یه‌كى ورد له‌سه‌ر سكالاَى یانه‌ى پیَرس له‌ یانه‌ى سلیَمانى كرا, ئه‌ویش به‌ هۆى یارى پیَكردنى یاریزانى سلیَمانى محه‌مه‌د مه‌حمود خه‌له‌ف له‌یارى ناوبراودا له‌پیَشتردا(یاریزانى ناوبراو) دووكارتى زه‌ردى وه‌رگرتبوو, مافى یارى كردنى له‌یارییه‌كه‌ نه‌بوو, هه‌ر بۆ ئه‌م مه‌به‌سته‌ برِیاردرا به‌هه‌ژماركردنى ئه‌نجامى یارییه‌كه‌ له‌به‌رژه‌وه‌ندى یانه‌ى پیَرس(3-0)گۆڵ, شایانى وتنه‌ ئه‌م یارییه‌ له‌ یارییه‌كانى هه‌فته‌ى ده‌یه‌مى قۆناغى یه‌كه‌مدابوو
2. لیَبوردن له‌ناوبژیوانى پله‌یه‌ك ریَبوار عه‌باس, بۆ به‌رِیَوه‌بردنى یارییه‌كان له‌ داهاتوودا.
3. راگرتنى راهیَنه‌رى یانه‌ى پیَشمه‌رگه‌ى هه‌ولیَر(تاریق تۆفیق) تا كۆتایى هاتنى یارییه‌كانى خولى لاوانى ئه‌م وه‌رزه‌, ئه‌ویش به‌هۆى هه‌ڵس و كه‌وتى دوور له‌گیانى وه‌رزشى و قسه‌وتن به‌ناوبژیوانانى یارى یانه‌كه‌یان له‌گه‌ڵ یانه‌ى ئارارات له‌میانى یارییه‌كانى خولى یازده‌هه‌م.
4. ده‌ستنیشانكردنى ده‌سته‌ى سه‌رپه‌رشتیاران و ناوبژیوانانى خولى دوا نزه‌هه‌مى لاوان و پیَشكه‌وتووان.