یه‌كێتی ناوه‌ندی تۆپی پێی كوردستان كۆبوونه‌وه‌ی ئاسایی خۆی به‌ئاماده‌بوونی جێگری سه‌رۆك و  سه‌رجه‌م ئه‌ندامانی رۆژی شه‌ممه‌ رێكه‌وتی 5/12/2009 گرێداو ئه‌م بڕیارانه‌ی خواره‌وه‌ی ده‌ركرد :
كۆبوونه‌وه‌كه‌ له‌ باره‌گای نوێنه‌رایه‌تی لیژنه‌ی ئۆلۆمپی كوردستان له‌ كه‌ركوك ئه‌نجامدرا به‌ ئاماده‌بوونی سه‌رۆك و ئه‌ندامانی لقی تۆپی پێی كه‌ركوك.
سه‌ره‌تا به‌رێز نه‌وزاد قادر سه‌رۆكی لقی تۆپی پێی كه‌ركوك به‌خێرهاتنی شاندی یه‌كێتی تۆپی پێی كوردستانی كرد ئه‌م هه‌نگاو چالاكیانه‌ی تۆپی پێی كوردستانی به‌رزنرخاند بۆ گرنگیدان به‌ تۆپی پێی كه‌ركوك ئینجا به‌رێز سه‌ركار عه‌لی خان  جێگری سه‌رۆكی یه‌كێتی تۆپی پێی كوردستان سوپاسی میوانداری گه‌رمی كرد و ئاماده‌بوونی ڕاگه‌یاندنكارانی به‌ كارێكی ئه‌كتیڤ وه‌سف كرد و ئینجا كۆبوونه‌وه‌كه‌ ده‌ستی پێكرد.
1. یه‌كێتیه‌كه‌مان پیرۆزبایی گه‌رم ئاڕاسته‌ی یانه‌كانی سه‌ركه‌وتوو بۆ خولی یانه‌پله‌یه‌كه‌كان و پله‌دووه‌كان ده‌كات, ئه‌نجامدانی یارییه‌كانی كۆتایی له‌شاری هه‌ولێر بۆ پله‌دووه‌كان و له‌شاری كه‌ركوكیش بۆ پله‌ سێیه‌كان له‌مه‌ڕاسیمێكی شایسته‌و قه‌شه‌نگدا نیشانه‌ی گرنگیدانی یه‌كێتیه‌كه‌مانه‌ بۆ بزاڤی تۆپی پێی كوردستان به‌گشت پله‌كان و ته‌مه‌نه‌كان.
أ‌. سه‌ركه‌وتنی هه‌ردوو یانه‌ی(پیشه‌سازی و شاوێس) بۆ ریزی یانه‌ پله‌یه‌كه‌كانی كوردستان بۆ وه‌رزی(2009-2010).
ب‌. سه‌ركه‌وتنی هه‌ردوو یانه‌ی(به‌ڕانه‌تی و كرێكاران)بۆ ریزی یانه‌پله‌دووه‌كانی كوردستان بۆ وه‌رزی(2009-2010).
2. په‌سه‌ندكردنی بڕیاری یه‌كێتی تۆپی پێی عێراقی ژماره‌(89780 )له‌ رێكه‌وتی 15/11/2009 سه‌باره‌ت به‌ به‌رزكردنه‌وه‌ی پله‌ی ئه‌م ناوبژیوانانه‌ی خواره‌وه‌ بۆ پله‌یه‌ك:
(1.چیا سه‌ڵاح محه‌مه‌د كه‌ریم- 2. سه‌باح حه‌مه‌ره‌زا- 3. تاریق ئه‌حمه‌د- 4. دارا جه‌لال- 5. فهمی محه‌مه‌د ئه‌مین-
6. خالید كه‌ریم- 7. كاروان سه‌باح- 8. ئارام ئه‌حمه‌د- 9. سه‌ربه‌ست خالید- 10. وه‌لید خالید-
11. جه‌مال هیلال- 12. عه‌بدولڕه‌حیم عه‌بدولستار).
له‌گه‌ڵ پیرۆزبایی و هیوای سه‌ركه‌وتنی به‌رده‌وام و كاریگه‌ر.
3. نوسراوی ژماره‌(1239) له‌رێكه‌وتی 3/12/2009 یانه‌ی پێشمه‌رگه‌ی سلێمانی سه‌باره‌ت به‌ یاریزان( هه‌رێم بورهان عه‌لی) پێویسته‌ ناوبراو سه‌ردانی یه‌كێتی تۆپی پێی كوردستان بكات له‌ كۆبوونه‌وه‌ی داهاتوو رۆژی شه‌ممه‌ رێكه‌وتی 12/12/2009 كاتژمێر(11)ی به‌یانی ئاماده‌بێت.
4. نوسراوی ژماره‌(1326) رێكه‌وتی 2/12/2009 یانه‌ی پێشمه‌رگه‌ی سلێمانی سه‌رباره‌ت به‌ یاریزانی لاوان (به‌رهه‌م نه‌جات فه‌ره‌ج) یاریزانی ناوبراو به‌ یاریزانی ده‌ره‌وه‌ی پارێزگا هه‌ژمار ده‌كرێت.
5. زیادكردنی ناوی یاریزانانی تیپه‌كانی لاوانی به‌شداربوو له‌خولی نایابی كوردستان دواین كات بۆ زیادكردنی ناوی یاریزانان 15/12/2009 دوای ئه‌م به‌رواره‌ زیادكردن ناكرێت و ده‌وه‌ستێت.
6. ره‌زامه‌ندی وه‌رگیرا بۆ كردنه‌وه‌ی خولێكی نێوده‌وڵه‌تی تایبه‌ت به‌ ڕاهێنه‌رانی گۆڵچیه‌كانی كوردستان به‌ سه‌رپه‌رشتی ڕاهێنه‌ری باوه‌ڕپێكراوی(FIFA) المانی توماس روی له‌ رێكه‌وتی 11/1/2010 كه‌ له‌كوردستان ئه‌نجام بدرێت.
7. ئاگاداری كۆتایی بۆ یانه‌ی سه‌وره‌ به‌ ئاماده‌كردنی منداڵانی تۆپ هێنه‌ره‌وه‌ له‌ یارییه‌كانی لاوان له‌ یاریگاكه‌یان.
8. به‌هۆی ووتنی قسه‌ی ناشرین و ده‌رچوون له‌ گیانی وه‌رزشی له‌لایه‌ن یاریده‌ده‌ری ڕاهێنه‌ری یانه‌ی كه‌ركوك(ئه‌حمه‌د سابیر)كه‌ له‌ خولی یه‌كه‌می لاوانی یانه‌پله‌نایابه‌كان له‌ یاری نێوان یانه‌كه‌یان و یانه‌ی پێشمه‌رگه‌ی سلێمانی بڕیاردرا:
أ‌. غه‌رامه‌كردنی ناوبراو به‌بڕی(150000)سه‌دوپه‌نجا هه‌زار دینار.
ب‌. دوورخستنه‌وه‌ی له‌ یاوه‌ری نه‌كردنی تیپه‌كه‌ی بۆ سێ‌ یاری داهاتووی یانه‌كه‌ی له‌خولی لاوان.